মাছৰ সাধু

জীৱনদাই মাছৰ সাধু কয় ৷ ডেকা কালত কিদৰে ভোগদৈৰ পানীত সাতুৰি-নাদুৰি মাছ ধৰিছিল তাৰ ৰোমাঞ্চকৰ অজস্ৰ কাহিনী তেখেতৰ জিভাৰ আগত ৷ শুনোতাই সেই কাহিনী শুনি ৰস পায় ৷ পানীত দিন গ’লে মাছ বঢ়াৰ দৰে তেখেতৰ কাহিনীৰ মাছবোৰৰো ওজন আৰু আকৃতি দিন গ’লে বাঢ়ি গৈ থাকে ৷ এবাৰ তেনেকুৱা কাহিনী এটাই জীৱনদাৰ পৰা নিজমুখে শুনাৰ সৌভাগ্য হ’ল ৷ তেখেতৰ কাহিনী কোৱাৰ  ধৰণেই  বেলেগ ৷ বৰ ৰসলগা ৷ বিয়াগোম মাছ এটা ধৰাৰ কাহিনী ৷ কাহিনীৰ শেষত মাছটোৰ ওজন আৰু আকৃতিৰ বিষয়ে কৈ সামৰাৰ পাল ৷  বোলো দাদা মাছটো কিমানমান আছিল ৷ ‘এহঃ তোৰ ধৰ’-অলপ ৰৈ মূৰটো খজুৱাই তেখেতে ক’লে-‘মানে তাৰ ফটো এখন লোৱা হৈছিল নহয় ৷ সেই খনেই ১০ কেজি মান হব ৷ মাছটো কিমান হব তই নিজেই এটা অনুমান কৰ ৷

টুৱাৰাম দত্ত   

ৰাজগড় ৰোড , গুৱাহাটী

২৫ / ১০ / ২০১২

tuwaramdutta@gmail.com